ZERO ZABOR

Iazko urtetik inoiz baino koloretsuago ikusten dugu herria. Kolore hauek naturarekiko oreka aldarrikatzen dute, etorkizuna osasunez, konpromisoz eta itxaropenez janzteko gogoa. Osasunez, inork ez dugulako nahi zabortegi kutsakorrik edo erraustegirik gure herrian. Konpromisoz, ezin garelako ikusle hutsak izan, iritsi da Zero Zabor norabidean urratsak emateko garaia. Azkenik, itxaropentsu, beste herri batzuen esperientziatik ikasi dugulako urrats haundiak eman daitezkela ohitura batzuk aldatuz.

Lizartzan bertan zenbait ekintza antolatu ziren gaiari buruzko informazioa emateko eta udalak Zero Zabor norabidearen aldeko apustua egin zuen. Guzti honen ondorioetako bat konposta egiten duten familia kopuruaren igoera nabarmena izan da, bai etxean eta bai auzo konposta guneetan. Hondakin organikoa etxean sortzen dugunaren ia erdia da. Zabortegietan usteldu eta arazo larriak ematen ditu, erraustegietan konposatu kaltegarriak sortzen ditu. Konpost bihurtuta ordea lurrera itzultzen da materia organikoa lurra aberastuz. Aurrerapen haundia beraz. Oraindik asko daukagu egiteko eta ikasteko baina guztion artean emaitza onak lor ditzazkegu. Beraz, animiatu, galdetu eta parte hartu.

Hala ere, beti gogoan izan behar dugu zaborrik onena sortzen ez dena dela. Askotan behar ez ditugun gauzak erosten ditugu eta beharrezko duguna erostera goazenean ere erosi nahi dugun horrekin batera hondakinak erostera behartuta gaude. Gehiegizko kontsumoan oinarritutako eredu ekonomikoaren ondorio da hau. Honen aurrean, badira salgai solido zein likidoak hondakinik sortu gabe erosteko aukera ematen duten berrerabiltzeko ontziak, poltsak, tuperrak eta hainbat tresna. Hoien erabilera bultzatu eta gune guztietara zabaltzeko baldintzak sortu behar dira.

Ihauterietan ere zabor asko sortzen da horretarako beharrik izan gabe. Beraz, aurtengo mozorroa prestatzeko saltokietara ez joatea proposatzen dugu. Etxeko arropak eta objektu desberdinak aprobetxatu eta nahasi daitezke buruan duzun mozorroa lortzeko eta beti dago eskulanetarako aukera. Sentitu, pentsatu, ekin!

Etorkizuna koloretan nahi dugu eta hori aldarrikatuko dugu.

Lizartza Zero Zabor